Պաշտպան
Սերն ավելանում է միայն կիսվելով: Դուք կարող եք ավելին ունենալ՝ տալով ավելին ուրիշներին:
Պաշտպաններն (ISFJ) իրենց զուսպ ու համեստ ձևով օգնում են փոխել աշխարհը: Լինելով աշխատասեր և նվիրված՝ անհատականության այս տեսակի մարդիկ պատասխանատվության խորը զգացում ունեն իրենց շրջապատի հանդեպ: Պաշտպանների վրա կարելի է հույս դնել, որ վերջնաժամկետին գործն ավարտին կհասցնեն, կհիշեն ծննդյան օրերն ու հատուկ առիթները, կպահպանեն ավանդույթները և իրենց սիրելիներին կողողեն հոգատարության և աջակցության ժեստերով: Բայց նրանք հազվադեպ են պահանջում ճանաչում այն ամենի համար, ինչ անում են՝ փոխարենը նախընտրելով չցուցադրել իրենց արածը։
Սա ընդունակ, կարող անձնավորություն է՝ բազմաթիվ ընծաներով: Չնայած զգայուն և հոգատար լինելուն՝ Պաշտպաններն օժտված են նաև գերազանց վերլուծական կարողություններով և մանրուքների հանդեպ ուշադրությամբ: Եվ չնայած զուսպ լինելուն՝ նրանց մոտ որպես կանոն լավ են զարգացած շփման հմտություններն ու նրանք ունեն ամուր սոցիալական կապեր։ պաշտպաններն իրոք ավելին են, քան իրենց մասերի ամբողջությունը, ու նրանց տարբեր ուժեղ կողմերը ցայտում են անգամ նրանց առօրյա կյանքի ամենահասարակ ասպեկտներում։
Հավատարմության ընծան
Պաշտպանների ամենակարևոր առանձնահատկություններից է հավատարմությունը։ Քիչ պաշտպաններ կան, որ թույլ կտան, որպեսզի ընկերությունը կամ հարաբերությունները կորչեն՝ ջանքերի պակասի պատճառով։ Փոխարենը, նրանք շատ էներգիա են ներդնում իրենց սիրելիների հետ ամուր կապեր պահպանելու համար, այլ ոչ թե պարզապես ուղարկում են «Ինչպե՞ս ես» ու նման կարգի հաղորդագրություններ: Այս անհատականության տեսակի մարդիկ հայտնի են նրանով, որ թողնում են ամեն ինչ և օգնության ձեռք են մեկնում, երբ ընկերը կամ ընտանիքի անդամը դժվար կացության մեջ է:
Պաշտպանների հավատարմության զգացումը սահմանափակված չէ միայն իրենց ամենամոտ մարդկանցով․ այն հաճախ ցուցաբերվում է մինչև անգամ իրենց համայնքների, գործատուների ու անգամ ընտանեկան ավանդույթների հանդեպ։ Սակայն նրանց նվիրվածությունն ու օգնելու պատրաստակամությունն ունի նաև բացասական կողմեր։ Այլ մարդիկ կարող են չարաշահել պաշտպանների օգնող, աշխատասեր տեսակը ու արդյունքում պաշտպանները կարող են զգալ սպառված ու հյուծված։ Եվ պաշտպանները կարող են մեղավոր զգալ կամ սթրես ապրել փոփոխությունների, անգամ անհրաժեշտ փոփոխությունների մասին մտածելիս, որոնք տեղի են ունենում իրենց, իրենց հարաբերությունների հետ կամ երբ փոխվում է ինչ-որ բաներ անելու նրանց ձևը։
Ստանդարտներից ամենաբարձրը
Պաշտպանների համար «բավականաչափ լավը» հազվադեպ է բավականաչափ լավ: Անհատականության այս տեսակն ունեցող մարդիկ կարող են բծախնդիր լինել մինչև պերֆեկցիոնիզմ: Նրանք անձամբ են կատարում իրենց պարտականությունները՝ հետևողականորեն առաջ գնալով և անելով այն, ինչ կարող են, որպեսզի գերազանցեն ուրիշների ակնկալիքները։
Բայց ի՞նչ է տեղի ունենում, երբ Պաշտպանների ջանքերն աննկատ են մնում կամ չեն գնահատվում: Թեև Պաշտպանները հակված են թերագնահատել իրենց ձեռքբերումները, դա չի նշանակում, որ նրանց դուր չի գալիս ճանաչում, կամ որ նրանց համար նորմալ է, որ իրենց արածն ընդունեն այնպես, կարծես թե այդպես էլ պետք է լիներ: Եթե նրանք չսովորեն պաշտպանել իրենց, Պաշտպանները կարող են հանգիստ կորցնել իրենց ոգևորությունն ու մոտիվացիան՝ ի վերջո դառնալով զայրացած մարդկանց հանդեպ, ովքեր կարծես թե պարզապես չեն գնահատում իրենց:
Օգնություն իրենք իրենց և ուրիշներին
Չնայած ինտրովերտ լինելուն՝ պաշտպաններն ունեն խորը սոցիալական էություն" Այլ մարդկանց կյանքերի մանրամասները հիշելու իրենց կարողության շնորհիվ պաշտպաններն ունեն հատուկ տաղանդ այնպես անել, որ ընկերներն ու ծանոթները զգան իրենց նկատված, ճանաչված ու սիրված։ Քիչ անհատականության տեսակներ կան, որոնք նվերներն այնքան լավ են ընտրում, որքան պաշտպանները՝ լինի դա փոքր նվեր թե մեծ նվեր։
Լինելով նվիրված ու մտածող՝ պաշտպանները մեծ ուրախություն են գտնում՝ օգնելով շրջապատի մարդկանց կառուցել կայուն, ապահով և երջանիկ կյանքեր: Այս անհատականության տեսակի մարդկանց համար կարող է հեշտ չլինել իրենք իրենց օգնել այնպես, ինչպես օգնում են այլ մարդկանց, բայց իրենց օգնելու դեպքում նրանք հաճախ ավելի շատ էներգիա և մոտիվացիա ունեն՝ ախարհին լավն անելու համար։