პროტაგონისტები (ENFJ) გრძნობენ, რომ მოწოდებულნი არიან ემსახურონ დიად მიზნებს ცხოვრებაში. მოაზროვნე და იდეალისტური პიროვნების ეს ტიპები ცდილობენ დადებითი გავლენა მოახდინონ სხვა ადამიანებზე და მათ გარშემო არსებულ სამყაროზე. ისინი იშვიათად ერიდებიან შესაძლებლობას, აკეთონ სწორი საქმე, მაშინაც თუ კი ამის გაკეთება არც ისე ადვილია.

პროტაგონისტები ლიდერებად იბადებიან, რაც ხსნის იმ ფაქტს, თუ რატომ გვხვდებიან ხასიათის ამ ტიპის წარმომადგენლები ბევრ გამოჩენილ პოლიტიკოსებს, მწვრთნელებსა და მასწავლებლებს შორის. მათი გატაცებები და ქარიზმა საშუალებას აძლევთ შთააგონონ სხვები არა მხოლოდ კარიერულად, არამედ ცხოვრების ყველა ასპექტში, მათ შორის ურთიერთობებში. ძალიან ცოტა რამეს თუ მოაქვს პროტაგონისტებისთვის ისეთი ძლიერი სიხარულისა და კმაყოფილების შეგრძნება, როგორც მეგობრებისა და საყვარელი ადამიანების გაძღოლას მათი საკუთარი თავის საუკეთესო ვერსიებად გახდომის გზაზე.

როცა მთელი სამყარო დუმს, ერთი ხმაც კი უძლიერესი ჩანს.

სამართლიანობის დაცვა

პროტაგონისტები ხშირად ხმამაღლა საუბრობენ თავიანთ ფასეულობებზე, მათ შორის ავთენტურობასა და ალტრუიზმზე. როდესაც რაღაც უსამართლოდ ან არასწორად მიაჩნიათ, ისინი ამას გამოხატავენ. თუმცა იშვიათად შეხვდებით უტიფარ და მეტისმეტად მიმწოლ პროტაგონისტებს, რადგან მათი სენსიტიურობა და გამჭრიახობა უბიძგებს მათ ისაუბრონ ისე, რომ რეზონანსი გამოიწვიონ.

პიროვნების ამ ტიპებს აქვთ არაჩვეულებრივი უნარი, ჩაწვდნენ ადამიანების ძირითად მოტივაციასა და რწმენას. ზოგჯერ ისინი შეიძლება ვერც კი ხვდებოდნენ, როგორ აღიქვამენ სხვის გონებასა და გულს ასე სწრაფად. გამჭრიახობის ნიჭი პროტაგონისტებს წარმოუდგენლად დამაჯერებელ და შთამაგონებელ კომუნიკატორებად აქცევს.

პროტაგონისტების საიდუმლო იარაღი მათი წრფელი განზრახვაა. როგორც წესი, ისინი მოტივირებულნი არიან გულწრფელი სურვილით, აკეთონ სწორი საქმე და არა სურვილით, მოახდინონ სხვა ადამიანებზე მანიპულაცია ან ზეგავლენა. მაშინაც კი, პროტაგონისტები არ ეთანხმებიან ვინმეს, ისინი ცდილობენ საერთო ენის გამონახვას. შედეგად, ხასიათის ამ ტიპის მქონე ადამიანებს შეუძლიათ კომუნიკაცია ისეთი მჭევრმეტყველებითა და მგრძნობიარობით, რომლის უგულებელყოფაც ფაქტობრივად შეუძლებელია - განსაკუთრებით მაშინ, როცა საუბრობენ ისეთ საკითხებზე, რომლებიც მათთან ახლოსაა.

ჩართულობა

როდესაც პროტაგონისტები ვინმეზე ზრუნავენ, მათ სურთ დაეხმარონ ამ ადამიანს პრობლემების მოგვარებაში - ზოგჯერ ნებისმიერ ფასადაც კი. კარგი ამბავი ის არის, რომ ბევრი ადამიანი პროტაგონისტების მადლიერია დახმარებისა და რჩევების გაწევისთვის. საბოლოო ჯამში, არსებობს მიზეზი იმისა, რომ მათ აქვთ ისეთი ადამიანების რეპუტაცია, რომლებიც სხვებს ცხოვრების გაუმჯობესებაში ეხმარებიან.

თუმცა სხვა ადამიანების პრობლემებში ჩარევა ყოველთვის არ არის წარმატების საწინდარი. პროტაგონისტებს, როგორც წესი, აქვთ მკაფიო ხედვა იმის შესახებ, თუ რა შეუძლიათ ან რა უნდა გააკეთონ ადამიანებმა საკუთარი თავის გასაუმჯობესებლად, თუმცა ყველა არ არის მზად ამ ცვლილებებისთვის. თუ პროტაგონისტები ძლიერად იმოქმედებენ თავიანთ ახლობლებზე, მათ შეიძლება უკმაყოფილების ან უსამართლო განსჯის შეგრძნება დაეუფლოთ. მიუხედავად იმისა, რომ პიროვნების ეს ტიპი ცნობილია გამჭრიახობით, ყველაზე გონიერმა პროტაგონისტებმაც კი შეიძლება ზოგჯერ არასწორად აღიქვან სიტუაცია ან უნებლიედ გასცენ არასწორი რჩევა.

გზაზე გაძღოლა

ხასიათის ამ ტიპის მქონე ადამიანები თავდადებული ალტრუისტები არიან, მზად არიან დაუპირისპირდნენ ყველასა და ყველაფერს და მხარი დაუჭირონ იმ ადამიანებსა და იდეებს, რომლებისაც სწამთ. დარწმუნების ეს უნარი აძლიერებს პროტაგონისტების თანდაყოლილ ლიდერულ უნარებს, განსაკუთრებით მათ უნარს, მოუწოდოს ადამიანებს ერთად მუშაობისკენ უფრო დიდი სიკეთის გასაკეთებლად.

თუმცა მათი უდიდესი ნიჭი მაგალითით ხელმძღვანელობაა. ყოველდღიურ ცხოვრებაში პროტაგონისტები ავლენენ იმას, თუ როგორ შეიძლება ერთი შეხედვით ჩვეულებრივი სიტუაციების მოგვარება თანაგრძნობით, თავდადებითა და ზრუნვით. ამ პიროვნებებისთვის, თუნდაც უმცირესი ყოველდღიური არჩევანი და მოქმედება - დაწყებული იმით, თუ როგორ ატარებენ უქმეებს და დამთავრებული იმით, თუ რას ეუბნებიან კოლეგას, რომელსაც პრობლემები აქვს - შესაძლოა აღიქმებოდეს ნათელი მომავლისკენ მიმავალ შესაძლებლობად.