მე საქმის გაჭიანურების და სიზარმაცის უფრო შემეშინდებოდა, ვიდრე იმ უნარების არგამოყენებისა, რომლებიც მერგო.

პრაგმატისტები (ISTJ) ამაყობენ თავიანთი კეთილსინდისიერებით. ხასიათის ამ ტიპის მქონე ადამიანები გულისხმობენ იმას, რასაც ამბობენ და როდესაც დებენ რაიმეს გაკეთების პირობას, აუცილებლად ასრულებენ მას.

პიროვნების ეს ტიპი მთლიანი მოსახლეობის საკმაოდ დიდ ნაწილს შეადგენს და მიუხედავად იმისა, რომ პრაგმატისტები შეიძლება არ იყვნენ განსაკუთრებულად თვალშისაცემნი ან ყურადღების მაძიებელნი, ისინი კუთვნილ წილზე მეტს აკეთებენ იმისათვის, რომ საზოგადოება მყარ, სტაბილურ საფუძველზე იდგეს. ოჯახებსა და საზოგადოებაში პრაგმატისტები ხშირად სარგებლობენ პატივისცემით საიმედოობის, პრაქტიკულობის, მათი რეალობაში დარჩენის უნარისა და ლოგიკის გამო, თუნდაც ყველაზე სტრესულ სიტუაციებში.

კეთილსინდისიერად ცხოვრება

პრაგმატისტების საკუთარი ღირსების გრძნობის საფუძველი მათი კეთილსინდისიერებიდან მოდის. ხასიათის ამ ტიპის მქონე ადამიანებს სჯერათ, რომ არსებობს სწორი გზა ნებისმიერ სიტუაციაში – და თუ ვინმე სხვაგვარად იქცევა, ალბათ საკუთარი მიზნებისთვის ცდილობს წესების შეცვლას. პრაგმატისტები დიდ პატივს სცემენ სტრუქტურასა და ტრადიციას. მათ ხშირად იზიდავთ ისეთი ორგანიზაციები, სამუშაო ადგილები და საგანმანათლებლო დაწესებულებები, რომლებიც გვთავაზობენ მკაფიო იერარქიასა და მოლოდინებს.

პრაგმატისტები იშვიათად ყოყმანობენ საკუთარ ქმედებებსა და არჩევანზე პასუხისმგებლობის აღებაზე. ზოგადად, ისინი მალე აღიარებენ საკუთარ შეცდომებს და ამბობენ სიმართლეს მაშინაც კი, თუ ეს მათ კარგად არ წარმოაჩენს. პრაგმატისტებისთვის პატიოსნება ბევრად უფრო მნიშვნელოვანია, ვიდრე სპექტაკლის დადგმა. მათ ურჩევნიათ დაიკმაყოფილონ საკუთარი სინდისი, ვიდრე მოიტყუონ სხვაზე შთაბეჭდილების მოხდენის მიზნით.

იმის გამო, რომ ისინი დაუღალავად ცდილობენ თავიანთი ვალდებულებების შესრულებას, პრაგმატისტებს ხშირად აბნევთ ადამიანები, რომლებიც ვერ იცავენ იმავე სტანდარტებს. ზოგჯერ, პრაგმატისტებმა შეიძლება უსამართლოდ შეაფასონ ადამიანები, რომლებიც ვერ შეესაბამებიან მათ მკაცრ თვითკონტროლს - შეიძლება იფიქრონ, რომ პირი ზარმაცი ან არაკეთილსინდისიერია, მაშინ, როცა იგი შეიძლება ამ დროს უბრალოდ სხვა გამოწვევებს უმკლავდებოდეს. მაშინაც კი, თუ პრაგმატისტები ხმამაღლა და ღიად არ განსჯიან, მათი აღშფოთება შეიძლება მაინც გამოჩნდეს და ეს მათ გარკვეულწილად მკაცრის ან არაემპათიურის რეპუტაციას უქმნის.

საქმის გამოსწორება

პრაგმატისტების ერთგულება შესანიშნავი თვისებაა და ის მათ ბევრ მიღწევას განაპირობებს. თუმცა აღნიშნული შეიძლება ასევე იქცეს იმ სისუსტედ, რომლითაც სხვა ადამიანები სარგებლობენ. ძლიერი სამუშაო ეთიკისა და მოვალეობის გრძნობის მქონე პრაგმატისტები შეიძლება რეგულარულად იღებდნენ საკუთარ თავზე სხვა ადამიანების პასუხისმგებლობას. მაშინაც კი, თუ პრაგმატისტები არ წუწუნებენ სიტუაციის გამო, ისინი შეიძლება დაღლილი ან იმედგაცრუებული აღმოჩნდნენ იმ შემთხვევაში, თუ მათგან მუდმივად რაღაცას მოელიან ან როდესაც საკუთარ თავზე იღებენ თავიანთი კოლეგების, მეგობრების ან საყვარელი ადამიანების მიერ გადადგმული ნაბიჯების გამოსწორების პასუხისმგებლობას.

პრაგმატისტები არ გამოირჩევიან ემოციების მარტივად გამოხატვის უნარით, მაგრამ ეს არ ნიშნავს იმას, რომ ხასიათის ამ ტიპის მქონე ადამიანები არ გრძნობენ იმედგაცრუებას ან წყენას, როცა იმაზე მეტს აკეთებენ, ვიდრე შეუძლიათ. თუ პრაგმატისტები არ დარწმუნდებიან, რომ მათი ურთიერთობები დაბალანსებული და მდგრადია, შეიძლება საბოლოოდ დააზიანონ ის სტაბილურობა, რომლის დაცვაზეც მუშაობენ. სასიხარულო ამბავი ის არის, რომ პრაგმატისტებს შეუძლიათ ისწავლონ შესაბამისი საზღვრების დაწესება და ხმამაღლა თქვან, როდესაც ისინი ზედმეტად არიან გადატვირთულები და შედეგად შეძლებენ მსოფლიოს შესთავაზონ თავიანთი მრავალი ნიჭი, მათ შორის სიცხადე, ერთგულება და საიმედოობა.