Insonlarga xuddi ular boʻlishi lozim boʻlgandek muomala qiling va siz ularga oʻzlari aylanishga qodir narsaga aylanishga yordam berasiz”.

Advokatlar (INFJ) eng noyob shaxsiyat turi boʻlishi mumkin, lekin ular bu dunyoda oʻzidan iz qoldirishi aniq. Ular mukammallikka ishonuvchi va prinsiplariga sodiq boʻlib, hayotda oqim boʻyicha suzish ular qoniqtirmaydi – ular bosh koʻtarib, oʻzgarish qilishni xohlaydi. Advokat shaxsiyati egalari uchun muvaffaqiyatni pul yoki obroʻ bilan oʻlchamaydi, ular muvaffaqiyatni oʻz salohiyatini roʻyobga chiqarish, boshqalarga yordam berish va dunyoda ezgulik uchun kurashda koʻradi.

Advokatlarning maqsad va orzulari yuksak boʻlsa-da, ularni quruq xayolparastlar bilan adashtirmaslik kerak. Bu shaxsiyat egalari uchun halollik juda ahamiyatli va ular oʻzlari toʻgʻri deb bilgan ishni qilmaguncha uncha-munchaga koʻngli toʻlmaydi. Ular nihoyatda vijdonli boʻlib, aniq qadriyatlar bilan hayot kechiradi hamda boshqalar yoki jamiyatning katta qismi fikriga koʻra emas, balki oʻzlarining aqli va intuitsiyasiga koʻra chindan ahamiyatli boʻlgan narsalarni koʻzdan qochirmaslikka intiladi.

Maqsadni izlash

Ehtimol, ularning shaxsiyat turi shu qadar kamyobligidanmi, advokatlar ongli yoki ongsiz ravishda aksariyat insonlardan farqlanish hissi bilan yashashga moyil. Oʻzlarining boy ichki dunyosi hamda hayotdagi maqsadini topishga boʻlgan kuchli, oʻzgarmas istagi tufayli ular doim ham atrofidagilar bilan chiqishib ketavermaydi. Bu advokatlar jamiyat tomonidan qabul qilinish yoki yaqin munosabatlarni yoqtirmaydi degani emas, shunchaki, ular baʼzan oʻzini notoʻgʻri tushunilgandek yoki dunyoga qarshi chiqayotgandek his qiladi, xolos.

Xayriyatki, bu zamon bilan hamnafas qadam tashlamayotganlik hissi advokatlarning dunyoni yaxshilashga boʻlgan ahdini susaytirmaydi. Advokatlar nohaqlikdan tinchini yoʻqotadi va odatda ular shaxsiy manfaatdan koʻra altruizm haqida koʻproq qaygʻuradi. Ular oʻzini koʻpincha boshqalarni yuksaltirish hamda mehr-shafqat tarqatish uchun oʻzlarining kuchli jihatlari, jumladan, kreativlik, tasavvur va sezgirlikni ishga solishga undalgandek his qiladi.

Koʻpchilik advokatlar boshqalarga yordam berishni oʻz hayotining missiyasi deb biladi va ular doimo vaziyatga aralashib, haq tomonning yonini olish yoʻllarini qidiradi. Bu shaxsiyat egalari, shuningdek, nohaqlik va yoʻqchilikni oʻtmish voqeligiga aylantirish mumkinligiga umid qilib, jamiyatning chuqurroq muammolarini hal etishga intiladi. Biroq gohida advokatlar oʻz ideallarini yaratishga qattiq kirishib ketganidan, oʻzi haqida tuzukroq qaygʻurmay qoʻyadi. Bunday xatti-harakatning odatga aylanishi stress va yonib ado boʻlishga olib kelishi mumkin.

Boshqalar (va oʻzi) bilan aloqa oʻrnatish

Advokatlar introvert boʻlishi mumkin, lekin ular boshqalar bilan oʻrnatilgan chuqur, samimiy munosabatlarini qadrlaydi. Bu shaxsiyat egalariga kamdan-kam narsa oʻzga insonni chindan bilish va oʻz navbatida oʻzini ham kimdir yaqindan bilishi keltirganchalik quvonch keltiradi. Advokatlar yuzaki muloqotdan koʻra mazmunli suhbatlarni koʻproq yaxshi koʻradi hamda ular iliq va taʼsirchan usulda muloqot qilishga moyil. Bu emotsional rostgoʻylik va ziyraklik ularning atrofidagi insonlarda katta taassurot qoldira oladi.

Tuygʻun va rahmdil boʻlgan advokatlar oʻz munosabatlariga juda koʻp quvvat va mehr sarflaydi. Bu evaziga ular doim oʻzini qadrlashlarini his qiladi degani emas. Advokatlar obdon oʻylab, ehtiyotkorlik bilan ish tutadi, odamlar ularning yaxshi niyatda harakat qilayotganini eʼtirof etmasligi esa ularni ranjitishi mumkin. Natijada, bu shaxsiyat egalariga hatto konstruktiv tanqid ham nihoyatda shaxsiy yoki ozorli tuyulishi mumkin.

Shaxsiy missiya

Koʻpgina advokatlar hayotida shaxsiy missiya borligini va shu missiyani bajarish uchun bu dunyoga kelganini his qiladi. Bunday shaxsiyat turiga ega odamlar uchun hayotning eng foydali tomonlaridan biri bu – maqsadni izlash va maqsadni topgach, uni toʻla-toʻkis bajarishdir.

Advokatlar tengsizlik va adolatsizlikka duch kelsa, kamdan-kam hollarda taslim boʻladi va taslim boʻlish oʻrniga yechim topish uchun oʻz intuitsiyasi va dardkashligiga murojaat qiladi. Advokatlarda qalb va aqlni muvozanatda tutish qobiliyati borligi tufayli, ular dunyoning katta yoki kichik xatolarini tuzatishga qaratilgan tugʻma intilishga ega. Bu shaxslar hammaga yordam berish bilan band boʻlganida vaqti-vaqti bilan tanaffus qilishi va oʻziga gʻamxoʻrlik qilishlari lozimligini yodda tutishi zarur.