Muhabbat faqat ulashish orqali koʻpayadi. Uni boshqalarga berish orqaligina oʻzingizga koʻproq olishingiz mumkin.

Himoyachilar (ISFJ) oʻzining oddiy va sodda yondashuvi orqali hayot davom etishiga hissa qoʻshadi. Bunday shaxsiyat turiga ega boʻlgan mehnatsevar va fidoyi odamlar atrofdagilar oldidagi masʼuliyatlarini chuqur his qiladi. Himoyachilarning belgilangan muddatlarga rioya qilishi, tavallud ayyomlari va maxsus kunlarni yodda tutishi, anʼanalarni qoʻllab-quvvatlashi va oʻz yaqinlariga gʻamxoʻrlik va yordam koʻrsatishiga ishonish mumkin. Shu qatorda ular kamdan-kam hollarda qilgan ishlariga tan berilishini talab qiladi va aksincha parda ortidan turib ish koʻrishni afzal koʻradi.

Bu qobiliyatli, aytganini qiladigan va koʻp tomonlama isteʼdodli shaxs turidir. Himoyachilar hissiyotli va gʻamxoʻr boʻlishiga qaramay, mukammal tahlilchi isteʼdodiga ega boʻlib, ikir-chikirlargacha eʼtibor qarata oladi. Ogʻir-bosiq boʻlishiga qaramay, yaxshi rivojlangan muloqot koʻnikmasiga va mustahkam ijtimoiy munosabatlarga ega. Himoyachilar haqiqatan ham boridan koʻra azizdir, ularning turli kuchli tomonlari esa kundalik turmushning hatto eng oddiy jihatlarida ham namoyon boʻladi.

Sadoqat tuhfasi

Himoyachilarning oʻziga xos fazilatlaridan biri – sadoqatdir. Doʻstlik yoki munosabat rishtalarining kuchsizligi bois yoʻqolishiga yoʻl qoʻyuvchi himoyachilar kamdan-kam uchraydi. Aksincha, ular oʻz yaqinlari bilan mustahkam aloqalarni saqlab qolishga katta kuch sarflaydi va bu faqatgina “Ahvolingiz yaxshimi?” qabilidagi qisqa xabarlar bilan cheklanib qolmaydi. Bunday shaxsiyat turiga ega odamlar doʻstlari yoki oila aʼzolari qiyinchilikka yoʻliqqanda, hamma narsadan tashlab, yordamga shoshishi bilan eʼtirof qozongan.

Himoyachilarning sadoqat tuygʻusi ularning eng yaqin odamlari bilan cheklanib qolmay, koʻpincha ularning davralariga, ish beruvchilariga va hatto oilaviy anʼanalariga ham tarqaladi. Shu qatorda, ularning sadoqati va joʻshqin xizmat qilish istagi baʼzan aks taʼsirni ham keltirib chiqaradi. Boshqa odamlar tomonidan himoyachilarning savobtalabligi va mehnatsevar feʼli suiisteʼmol qilinishi, himoyachilarning charchashiga va toliqishiga olib keladi. Buning oqibatida, himoyachilar oʻzini, munosabatlarni yoki oʻtmishdagi ishlarini oʻzgartirish, hatto zarur ishlarini oʻzgartirish haqida bosh qotirganida oʻzini aybdor his qilishi yoki tushkunlikka tushib qolishi mumkin.

Oliy standartlar

Himoyachilar uchun “yetarlicha yaxshi” degani kamdan-kam hollarda yetarli boʻladi. Bunday shaxsiyat turiga ega odamlar perfeksionizm darajasidagi mukammallikni talab qiladi. Ular oʻz masʼuliyatini koʻngilga yaqin olib, doim koʻproqqa va yuqoriroqqa intiladi hamda boshqalarning kutilmalaridan ustun boʻlish uchun bor imkoniyatini ishga soladi.

Oʻz oʻrnida himoyachilarning saʼy-harakatlari eʼtiborga olinmasa yoki yetarlicha baholanmasa-chi? Himoyachilar oʻz yutuqlarini kamaytirib koʻrsatishga moyil boʻlsa-da, bu ular eʼtirofdan suyunmasligini yoki saʼy-harakatlarining odatdagidek qabul qilinishiga befarq boʻlishini anglatmaydi. Agar ular oʻzini himoya qilishni oʻrganmasa, oxir-oqibatda ishtiyoq va motivatsiyasini yoʻqotib, ularni qadrlamaydigan odamlardan ranjib qolishi mumkin.

Boshqalarga va oʻziga gʻamxoʻrlik qilish

Himoyachilar introvert boʻlishiga qaramasdan, chuqur ijtimoiy feʼlga ega. Boshqa odamlarning hayotidagi tafsilotlarni eslab qolish qobiliyati tufayli, himoyachilar doʻstlari va tanishlariga eʼtibor berish, bilish va qadrlash hissini tuhfa qiluvchi alohida isteʼdodga sohibi hisoblanadi. Katta yoki kichik boʻlishidan qatʼi nazar, vaziyat uchun eng mos sovgʻani tanlay olishda shaxsiyat turlarining faqat ayrimlarigina himoyachilar bilan bellasha oladi.

Fidoyi va gʻamxoʻr himoyachilar atrofdagilarga barqaror, xavfsiz va baxtli hayot qurishda yordam berishdan katta quvonch topadi. Bunday shaxsiyat turiga ega odamlar uchun oʻzini oʻziga boshqalarga koʻrsatgandek koʻrsatish oson boʻlmasligi mumkin, lekin buni uddalay olsa, bu dunyoda yaxshilik qilish uchun koʻproq quvvat va motivatsiyaga ega boʻlishini bilib oladi.